Dotze aspirants a abitar er unic pis de loguèr assequible en Garòs

Er Ajuntament de Naut Aran a barrat eth tèrme tà sollicitar eth loguèr deth prumèr pis assequible ena localitat de Garòs, damb eth que cerque aufrir solucions abitacionaus en ua zòna damb prètzi de mercat tanplan nauti. Aguest immòble, plaçat en carrèr Solei numèro 11, se logarà pendent cinc ans per 450 èuros ath mes, excludint còsti, e forme part deth plan municipau tà crear un parc de viuenda publica.

Pendent eth periòde de sollicituds, que finalizèc er 1 d’abriu, s’arrecebèren 12 candidatures de vesins deth municipi.

Era Comission d’Abitatge avalorarà cada cas era setmana que vie tà determinar eth beneficiari. Era prevision ei qu’era familha seleccionada pogue installar-se en pis a compdar deth mes de junh.

Era viuenda, que compde damb 80 m², includís ua sala d’estar, codina equipada, banh complèt, sala de caudères, lauadora, secadora e dues abitacions. Eth sòn prètz en mercat privat poderie duplicar o arribar a triplicar eth còst aufertat peth consistòri. Aguesta iniciativa respon ath creishent besonh de viuenda assequibla en Naut Aran, a on es loguèrs en portaus coma Idealista oscilen entre es 900 e es 2.000 èuros mensuaus, en tot arribar a chifres encara mès nautes en zònes toristiques.

Eth baile, César Ruiz-Canela, destaquèc era importància deth projècte: “Èm tanplan contenti damb era responsa ciutadana, perque reflèxe eth besonh urgent de viuenda assequibla. Aguest pis ei sonque eth començament: eth nòste objectiu ei bastir enquia 30 viuendes assequibles enes pròplèuss tres ans”, diguec. Entre es pròplèus projèctes destaquen quate pisi en Salardú e un blòc municipau en Baqueira.

Cau rebrembar qu’aguesta viuenda siguec reformada per ajuntament damb ua inversion de mès de 65.000 èuros, finançadi pera venda de parcèles. S’adjudicarà mejançant un sistèma de punts que priorize factors coma antiquitat en padron municipau, hilhs a cargue, discapacitat e lòc de trabalh.